Beyləqan Şəhər Bələdiyyə sədrinə məxsus Qum-çınqıl karxanasını kimlər himayə edir?

Beyləqan rayonunda qanunsuz fəaliyyətə göstərən qum-çınqıl karxanası ilə bağlı qalmaqallı iddialar gündəmdən düşmür. İddialara görə, Beyləqan Şəhər Bələdiyyəsinin sədrinə məxsus olan karxana illərdir fəaliyyət göstərsə də, aidiyyəti qurumların tədbirləri nəticəsiz qalır.
Redaksiyamıza daxil olan məlumat əsasında əməkdaşımız əraziyə yollanıb və karxanadan görüntülər əldə edib. Fotolardan açıq şəkildə görünür ki, ərazidə qum-çınqıl daşınması və hasilatı davam edir. Halbuki, məsələ ilə bağlı Ağcabədi 9 saylı Regional Ekologiya və Təbii Sərvətlər İdarəsi karxanaya cərimə tətbiq olunduğunu açıqlayıb.
Sual yaranır: Əgər obyekt cərimələnibsə və fəaliyyəti qanunsuz hesab olunursa, bəs niyə fəaliyyət hələ də davam edir? Kimlər bu karxananın arxasında dayanır? Hansı məmur və ya qurum bu qanunsuzluğa göz yumur?
Ən narahatedici məqam isə odur ki, ekoloji tələblərin kobud şəkildə pozulduğu iddia edilən ərazidə dövlətin nüfuzu açıq şəkildə sual altına düşür. Bir tərəfdən qanunlardan danışılır, digər tərəfdən isə həmin qanunların gözü qarşısında pozulduğu görüntülənir.
Yerli sakinlərin sözlərinə görə, ağır texnikaların fasiləsiz işləməsi ətraf mühitə ciddi ziyan vurur, yolları yararsız hala salır və kənd təsərrüfatına mənfi təsir göstərir. Buna baxmayaraq, məsələ ilə bağlı ciddi və nəticəyönümlü addımların atılmadığı iddia olunur.
İctimaiyyət isə haqlı olaraq soruşur: Qanun sadəcə adi vətəndaş üçünmü keçərlidir? Əgər bir karxana cərimədən sonra belə fəaliyyətini dayandırmırsa, bu halda dövlət qurumlarının qərarlarının təsir gücü haradadır? Bizi izləyin yeni video görüntüləri təqdim edəcəyik.
Mövzu ilə bağlı qarşı tərəfin mövqeyini dərc etməyə hazırıq.