Yevlax mədəniyyətində analoqu olmayan məzuniyyət: Qarxun kənd klubu niyə sahibsiz qoyulub?

Yevlax mədəniyyətində analoqu olmayan məzuniyyət: Qarxun kənd klubu niyə sahibsiz qoyulub?

Yevlax rayon Mədəniyyət Mərkəzində məzuniyyət qərarı suallar doğurur.

AFTV. az-a daxıl olan məlumata görə, Yevlax rayon Mədəniyyət Mərkəzinin direktor əvəzi Leyla Abdullayevanın qəbul etdiyi qərar ətrafında ciddi suallar yaranıb.
Məlumata görə, Yevlax şəhər Mədəniyyət Mərkəzinin filialı olan Qarxun kənd klubunun müdiri və mədəni təşkilatçısı eyni vaxtda məzuniyyətə göndərilib.
İndi ortaya çox sadə, lakin cavabı vacib olan sual çıxır:
Qarxun kənd klubu həmin müddətdə kimə həvalə olunub?
Əmək Məcəlləsində işçilərin qanuni məzuniyyət hüququ tanınır və iki əməkdaşın eyni vaxtda məzuniyyətə çıxmasını avtomatik olaraq qadağan edən norma yoxdur. Lakin qanunvericilik məzuniyyətlərin rəsmiləşdirilməsini, uçotunu və işin normal təşkilini tələb edir. Məcəllənin 133-cü maddəsinə əsasən, işin normal gedişini tənzimləmək məqsədilə məzuniyyətlərin növbəlilik cədvəlləri tərtib edilə bilər. 138-ci maddə isə məzuniyyətin əmrlə rəsmiləşdirilməsini və uçotunun aparılmasını tələb edir.
Deməli, məsələ məzuniyyət hüququnun özündə deyil. Məsələ dövlət mədəniyyət müəssisəsinin fəaliyyətinin necə təşkil edilməsindədir.
Əgər klub müdiri də, mədəni təşkilatçı da eyni vaxtda iş yerində yoxdursa, o zaman Qarxun kənd klubunun fəaliyyəti kim tərəfindən həyata keçirilib? Klub açıq olubmu? Tədbirlər keçirilibmi? Vətəndaşlara xidmət göstərilibmi? İşçilərin vəzifələrini müvəqqəti olaraq kim icra edib?
Əgər bu müddətdə klub faktiki olaraq fəaliyyət göstərməyibsə, onda artıq söhbət sadəcə məzuniyyətdən deyil, dövlət mədəniyyət müəssisəsinin idarə olunmasının keyfiyyətindən gedir.
Burada daha bir mühüm məqam var: məzuniyyətin verilməsi işçinin hüququdur, lakin rəhbərliyin vəzifəsi də müəssisənin işini düzgün təşkil etməkdir. Əmək Məcəlləsinin 110-cu maddəsi işçilərin məzuniyyət hüququnu təmin edir, 111-ci maddə isə məzuniyyətdə işçinin iş yeri və vəzifəsinin saxlanılmasını nəzərdə tutur.
Ona görə də Yevlax rayon Mədəniyyət Mərkəzinin rəhbərliyi cəmiyyətə aydın cavab verməlidir:
— Qarxun kənd klubunun müdiri və mədəni təşkilatçısı hansı tarixlərdə məzuniyyətə göndərilib?
— Bu şəxslərin hər ikisinin eyni vaxtda məzuniyyətə çıxmasına kim qərar verib?
— Həmin müddətdə onların vəzifələrini kim icra edib?
— Qarxun kənd klubunun fəaliyyəti həmin günlərdə necə təmin olunub?
— Vəzifələrin müvəqqəti icrası barədə əmr verilibmi?
— Klub həmin müddətdə faktiki fəaliyyət göstəribmi?
Əgər bütün bu suallara sənədlərlə əsaslandırılmış cavab varsa, ictimaiyyətə açıqlansın.
Yox, əgər iki əsas əməkdaşın eyni vaxtda məzuniyyətə buraxılması nəticəsində kənd klubu faktiki olaraq nəzarətsiz və fəaliyyətsiz qalıbsa, onda məsələ artıq “məzuniyyət vermək olar, ya yox?” məsələsi deyil.
Məsələ budur:
Dövlətin mədəniyyət ocağı işçilərin məzuniyyətə çıxması ilə niyə sahibsiz qalmalıdır?
Mədəniyyət müəssisəsi adi bir otaq deyil ki, qapısı bağlansın və işçilər qayıdana qədər gözləsin. Kənd klubu yerli əhalinin mədəni tədbirlərinin, görüşlərinin, müxtəlif təşəbbüslərin həyata keçirildiyi məkandır.
Bu səbəbdən Yevlax rayon Mədəniyyət Mərkəzinin rəhbərliyindən Qarxun kənd klubunda idarəetmənin və fəaliyyətin hansı əsaslarla təşkil edildiyinə dair rəsmi açıqlama gözlənilir.
Çünki qanun işçiyə məzuniyyət hüququ verir, amma dövlət müəssisəsini idarə etmək məsuliyyətini heç kimdən götürmür.
Qarxun kənd klubu məzuniyyətə göndərilən rəhbərliyin ardınca məzuniyyətə çıxmamalıdır.

Qarşı tərəfin də mövqeyini işıqlandırma hazırıq