MTK-lardan qanunsuz addım: İpotekada olan mənzilə çıxarış alınması üçün bütün əmlaklara dair etibarnamə tələb edilir



Şirkət ipotekası ilə mənzil alanların çıxarış əldə etmək istədikləri zaman MTK-ların vətəndaşlardan bütün əmlaklara dair etibarnamə tələb etməsi məsələsi yenidən gündəmə gəlib. MTK-lardan birinin mülkiyyətçidən aldığı etibarnamənin görüntüləri yayılıb. Bəs belə bir etibarnamə imzalayan vətəndaşı qarşıda hansı təhlükələr gözləyir?
 
AFTV.az Pravda.aza istinadən bildirir ki, məsələnin hüquqi tərəflərini mütəxəssislərlə araşdırıb.

Hüquqşünas Əkrəm Həsənov deyib ki, bu, böyük təhlükədir: “Heç kimə bütün əmlaklarla əlaqədar əqdləri bağlamaq səlahiyyətini vermək olmaz. Sabah o, MTK-ya aid olmayan əmlakı da satar. Ümumiyyətlə, etibarnamə verərkən konkretliyə olmağa çalışmaq lazımdır. MTK sizdən niyə etibarnamə istəyir? Sizə nə lazımdırsa, gedib özünüz edin. Aydındır ki, çıxarış almaq məqsədilədir. Hələ yəqin ki, MTK buna görə vətəndaşlardan “xidmət haqqı” da alır. Verməyin! Deyin ki, hara getmək lazımdırsa, özüm gedəcəyəm. Heç kimdən zorla etibarnamə almaq olmaz. Mənzili almısınız, vəssalam. MTK-lar əlavə qazanc yeri axtarırlar ki, necə edim, vətəndaşdan əlavə qazanc çıxarım?”
 
Əmlak məsələləri üzrə ekspert Elnur Fərzəliyev də bildirib ki, vətəndaş bu cür etibarnaməni nəinki MTK-ya, hər hansı digər şəxsə belə verə bilməz:

“Etibarnaməni vətəndaş yalnız ən etibar etdiyi şəxsə, yaxud ər arvadına, ata övladına, bacı qardaşına və s. verə bilər. Çünki belə bir etibarnamə ilə şirkət həmin şəxsin bütün əmlaklarını sata,  müqavilələrə xitam verə, əmlakı banka girov qoya, ipoteka kreditinə çevirə bilər. Şirkət əgər vətəndaşın mənzili üçün etibarnamə yolu ilə çıxarış alırsa, mütləq şəkildə həmin etibarnamədə bir istiqamət göstərilməlidir. Vətəndaşa məxsus olan ünvandakı mənzilin sənədlərini aidiyyəti quruma təqdim edib, digər sənədi götürmək olar. Birmənalı şəkildə həmin etibarnamə üzərindən alqı-satqı etmək, banka girov qoymaq, müqaviləni ləğv etmək kimi bütün müddəalar etibarnamədən çıxmalıdır. Vətəndaş qarşı tərəfə müqaviləni ləğv etmək səlahiyyəti belə verirsə, etibarnamə hər hansı fırıldaqçının əlinə keçsə, təbii ki, o, vətəndaşın həmin əmlak üzərində bağladığı müqaviləni ləğv edə, mənzili digər şəxsə sata, əmlakı sənədləşdirib, özününküləşdirə bilər. Bu cür etibarnamə çox təhlükəlidir. Bir sözlə, vətəndaş bu etibarnamə ilə bütün əmlakları üzərindəki hüquqlarını digər şəxsə ötürüb. Təbii ki, yanlışdır. Hər hansı şirkətin vətəndaşdan bu formada etibarnamə almaq səlahiyyəti yoxdur. Bu, vətəndaşın mülkiyyət hüququnun pozulmasına, mülkiyyətinin əlindən çıxmasına gətirib çıxara bilər”.