Əmircanın “beşikdən qəbrə qədər” bələdiyyə sədri Cəmilə Ağayeva “icra başçıları məktəbi”ndə oxuyurmuş... -İLGİNC

Xalqın şüurunda belə bir stereotip formalaşıb ki, qadın rəhbər olan yerdə səliqə-səhman var, məsuliyyət var, müsbət nəticə var. Ölkəmizdə gender bərabərliyinin təmini, cəmiyyət həyatında qadın iştirakçılığının və fəallığının artırılması müstəvisində əhəmiyyətli tədbirlər həyata keçirmiş və keçirməkdədir. Məsələn, ölkə iqtisadiyyatının inkişaf prioritetləri və milli xüsusiyyətləri nəzərə alınmaqla qadın sahibkarlığının inkişafının təşviqi, eləcə də parlament və bələdiyyə seçkilərində qadınlara səs verilməsi də bu sahədə diqqətaliyiq inkişafın göstəricisidir.
Yəqin ki, paytaxtın Suraxanı rayonu, Əmircan qəsəbəsinin bələdiyyə sədri Cəmilə Ağayevaya az-çox səs vermiş olan sakinlər də ümid edirmişlər ki, bundan sonra qəsəbənin yerli əhəmiyyətli məsələlərinin həllində Cəmilə xanımın köməyi dəyə bilər. Amma seçicilər C. Ağayevanı yerli özünüidarəetmə orqanına üzv seçmişdilər, sədr deyil.
Budur, 29 yanvar 2025-ci il tarixi Azərbaycan Respublikasında bələdiyyə seçkiləri günü kimi təyin olunub. Bələdiyyə üzvlüyünə namizədliyini irəli sürən Cəmilə Ağayeva isə hələ seçki olmamış özünü artıq “seçilmiş” kimi aparır, növbəti 5 illiyə özünü hazırlayır. Görünür, o, məsələnin seçicilərin səsi ilə deyil, “yuxarılarda” kiminsə, kimlərinsə təyinatı əsasında həll olunduğuna əmindir.
Son illər C. Ağayeva haqda mətbuatda, mediada gedən məlumatlardan bəlli olur ki, o, işlədiyi dövrdə heç də müsbət xarakterizə olunmayıb. Bələdiyyənin balansında olan qəbirstanlıqda məzar yerlərinin satılması məsələsində ehtikarlıq etməsi, pandemiya dövründə epidemiya əleyhinə qaydalara zidd gedərək təmtəraqlı xeyir-şər məclisləri düzənləməsi onu qınağa tuş gətirmişdir.
Yaxın keçmişdə, 2023-cü ilin noyab ayında Dövlət Vergi Xidmətinin Bakı şəhəri Lokal Gəlirlər Baş İdarəsi Ağayeva Cəmilə Nəzər qızının vergi borcuna görə məhkəməyə ərizə ilə müraciət edərək onun Azərbaycandan çıxışına "stop" qoyulmasını xahiş etdiyi barədə xəbər yayıldı.
2024-cü ilin iyulunda isə Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti Cəmilə Ağayevaya cərimə yazdı. Dövlət Xidməti bələdiyyə sədri barəsində İnzibati Xətalar Məcəlləsinin 555.1-ci maddəsinə əsasən, cərimə protokolu tərtib etdi. Buna səbəb isə C. Ağayevanın baş verən bədbəxt hadisə barədə müvafiq qurumu vaxtında məlumatlandırmaması olmuşdu. Bələdiyyə sədrinin barəsində protokol tərtib olunan maddədə deyilir ki, istehsalatda baş verən bədbəxt hadisələrin araşdırılması üçün hadisə baş verən gün işəgötürən tərəfindən əmək qanunvericiliyinə əməl olunmasına dövlət nəzarətini həyata keçirən müvafiq icra hakimiyyəti orqanına bu barədə məlumatın verilməməsinə görə min manatdan min beş yüz manatadək məbləğdə cərimə edilir. Ancaq vəzifəli şəxsin hadisə barədə məlumatı gizlətmək cəhdi onun özünün məsuliyyətdən yayınmaq istəyi ilə də əlaqəli ola bilərdi. Təəssüf ki, məhkəmələrdə mübahisələndirilən bu çəkişmələrin təfərrüatları ictimaiyyətə açıqlanmamış qaldı.
Bütün hallarda rəvac verdiyi bu sadalanan nöqsanlar (yumşaq ifadədir – “Gündəm Xəbər”) Cəmilə Ağayevanı növbəti bələdiyyə seçkilərində yenidən namizədliyini vermək fikrindən daşındırmalı, vəzifədən necə deyərlər, “üzüsulu” getməyə sövq etməli idi. Ancaq görünür, onun niyyəti heç də xalqa xidmət etmək deyil, kürsüsündən bərk yapışmaq, təkbaşına qərarlar verməkdə davam etməkdir. O kürsüdən ki, ona yalnız quru maaş qazandırmayıb.
İnsafən, qeyd edək ki, C. Ağayeva yetərincə savadlıdır. Hal-hazırda sonuncu kursunda qiyabi oxuduğu Dövlət İdarəçilik Akademiyası onun dördüncü təhsil müəssisəsidir. Özü də “beşikdən qəbrə qədər oxuyanlardanam” deyib öyünür. Halbuki, yiyələndiyi ixtisasların heç biri üzrə istedadı üzə çıxmayıb. Qohumu olduğuna görə fəxr etdiyi, Azərbaycanın ilk peşəkar rəssamlıq təhsili almış qadın rəssamı rəhmətlik Maral Rəhmanzadə kimi incilər yaratmayıb. Baxmayaraq ki, birinci ixtisası incəsənət üzrədir. Göründüyü kimi, hədəfləri böyükdür. Hətta söz gəzir ki, Cəmilə xanım məhrəm məclislərdə ümumən Suraxanı rayonuna uğurla başçılıq edə biləcəyini, lakin hələ o vaxtın yetişmədiyini də anons edib.
Amma savad çox şey demək olsa da, hər şey demək deyil. Bir bələdiyyəni idarə edə bilməyən dövləti, dövlət qurumunu, yaxud rayonu necə idarə edə bilər axı? Daha yaxşı olmazmıydı ki, C. Ağayeva bələdiyyə işlərini daha bacarıqlı həmkəndlilərinə buraxıb heç olmasa axırıncı kursu əyani oxusun?
Son söz: Əmircan deyiləndə Abbasqulu Ağa Bakıxanov, Murtuza Muxtarov, Ağaxan Abdullayev, Səttar Bəhlulzadə, Əlisöhbət Sumbatzadə, Tofiq Bayram və başqa görkəmli ziyalılar yada düşəcək, amma Cəmilə Ağayeva tez unudulacaq.(gundemxeber.az).

Aftv.az