Başçı icra hakimiyyətinin səhifəsini ŞƏXSİ BLOQUNA ÇEVİRİB? FOTO

Zaqatalanın icra başçısı Mübariz Əhmədzadə qardaşı Əhməd Əhmədzadəni İcra Hakimiyyətinin rəsmi səhifəsində təbrik edib.

2025-ci il yanvarın 7-də Prezident İlham Əliyev Əhməd Əhmədzadəni "Şərəf” ordeni ilə təltif edib.

Bundan sonra Zaqatala Rayon İcra Hakimiyyətinin rəsmi səhifəsində belə bir təbrik yazılıb: "Azərbaycan Respublikası Prezidentinin Sərəncamı ilə Əhməd Cuma oğlu Əhmədzadə Azərbaycan Respublikasında dövlət qulluğunda uzunmüddətli səmərəli fəaliyyətinə görə "Şərəf” ordeni ilə təltif edilib.

Zaqatala Rayon İcra Hakimiyyəti Əhməd Cuma oğlu Əhmədzadəni ölkə rəhbəri tərəfindən bu yüksək ada layiq görülməsi münasibəti ilə təbrik edir və peşəkar fəaliyyətində uğurlar arzulayır".

Dövlət qurumunun rəsmi səhifəsində rayonla bağlı məsələlər və icra hakimiyyətinin gördüyü işlər paylaşılmalıdır. Amma Mübariz Əhmədzadə İcra Hakimiyyətinin rəsmi səhifəsini öz şəxsi səhifəsi və ya bloqu kimi istifadə edir.

Mübariz Əhmədzadə 27 dekabr 2007-ci ildən -1 sentyabr 2009-cu ilədək Qax Rayon İcra Hakimiyyətinin başçısı vəzifəsini icra edib.

2009-cu ildən o, Zaqatalanın icra başçısı vəzifəsində çalışır.

Əhməd Əhmədzadə 1993–2004-cü illərdə Azərbaycan Respublikası Nazirlər Kabineti yanında Meliorasiya və Su Təsərrüfatı Komitəsinin sədri, 2004–2006-cı illərdə Kənd Təsərrüfatı Nazirinin birinci müavini, Kənd Təsərrüfatı Nazirliyi yanında Dövlət Meliorasiya və Su Təsərrüfatı Agentliyinin baş direktoru, 2006–2021-ci illərdə Azərbaycan Meliorasiya və Su Təsərrüfatı Açıq Səhmdar Cəmiyyətinin sədri vəzifələrində çalışıb.

Respublika Dövlət Aqrar İslahatı Komissiyasının üzvü, Fövqəladə Hallar üzrə Dövlət Komissiyasının sədr müavini olub.

2021-ci ilin aprel ayında Baş nazir Əli Əsədovun müşaviri təyin olunub.

2024-cü ilin oktyabr ayında baş nazirin köməkçisi vəzifəsinə keçirilib.

"Arqument.az" məsələ ilə bağlı Zaqatala Rayon İcra Hakimiyyətindən münasibət öyrənə bilməyib.



Aftv.Az