Döşək üstündə bayraq qaldıranların "lotu"luğu... - AXI NİYƏ?..

Dövlət Sərhəd Xidmətinin mayoru, kikboksinq üzrə Əməkdar məşqçi və Əməkdar idman ustası Fuad Zeynalovun hücuma məruz qalması sıradan hadisə deyil. Hücumun sifarişçisinin Azərbaycan Kikboksinq Federasiyasının vitse-prezidenti, dünya və Avropa çempionu Ramal Aslanov olduğu bildirilir. Bütün paytaxtın kamera nəzarətində olduğu bir şəraitdə R.Aslanovun bir qrup azğın dəstəsinin nümayişkəranə şəkildə adam döyməsi hədsiz arxayınlığın, özgüvənin və qudurğanlığın nəticəsidir.

Dekabrın 25-də şəhid olan pilotumuz Aleksandr Kalyaninov da 1992-ci il təvəllüdlüdür, Ramal Aslanov da! Biri göyün üzündə 30 insanın həyatını xilas edib, biri də adam döydürür. Mən dəqiq əminəm ki, Ramal həmişə Aleksandrdan yaxşı yaşayıb, heç bəlkə Aleksandrın maşını da olmayıb.

Bizim cəmiyyət zəifləri linç etmək üçün tez səfərbər olur, amma Ramaldan və onun arxasındakı dostlardan qorxurlar. Bir neçə gündür dövlətin mayoru döyülüb, onu döyənlər əvvələr də evinə basqın ediblər, amma hamı susub. Niyə? Çünki Ramalın qolundan, pulundan, hətta Feysbuk profilindəki şəkillərindən qorxurlar. Siyavuş Novruzovu lağa qoymağa nə var ki… Amma yaxşı ki, dövlət var, sifarişçini də, xuliqanları da içəri soxub. Hadisə dövlətin yox, sosial şəbəkə istifadəçilərinin ümidinə qalsaydı, Ramalın əvəzinə gedib “Baboş”u tutub içəri soxardı.

Ümumiyyətlə, ölkədə idmana və idmançılara münasibət dəyişməlidir. Döşək üstündə hansısa fənd işlətməklə yüz minlərlə pul vəsaiti və çox bahalı hədiyyələrlə mükafatlandırılan idmançıların hərəkətləri nümunəvi olmalıdır. Reallıq isə başqa şəkildədir. Pul da verirlər, vəzifə də, ev də, maşın da! Dünya və olimpiya çempionu olan elə idmançılarımız var ki, idmandan uzaq düşüblər, özlərindən sonra məktəb qura bilmirlər, iş adamı olublar, “razborka”lara gedirlər. Titul sahibi olan nə qədər idmançılarımız var ki, özlərini ölkənin yiyələri hesab edirlər. Bu adamları bu cür harın mövqeyə çatdıran dövlətin xoşməramlı diqqəti və qayğısıdır. İdmançılar bina tikir, otel işlədir, marketlər açır, avtosalonlar qururlar, bu azmış kimi iş adamları arasında “razborka”ları həll edirlər, bəzi məmurların tapşırıqlarını icra edirlər. İndi təsəvvür edin, Kikboksinq Federasiyasının rəhbərliyində olan hər kəs bina tikir. Elə bil, elə bil yox e, elə əslində mafiyadırlar, Bakının neçə rayonu bunların himayəsindədir. Tiksinlər də, amma o qədər harınlayıblar ki, dövlətin zabitini də döyürlər.

Əvvəllər “razborka” məsələləri avtoritetlərin işi hesab olunurdu. Bəxtiyar, Hikmət, Mamed, Rövşən, Quli kimi adamların olmadığı dövrdə Ramal və onun qulağıqırıq dostlarının “lotu"luq” etməsi adama pis təsir edir. Bu adamlar lotu deyil axı, ola da bilməzlər. Dövlətin mayorunu döydürən, evinə hücum çəkən Ramalın çəkisi rəhmətlik Bəxtiyarın təsbehindən yüngül idi. Evə hücum çəkərlər ə?! Belələri rəhmətlik Rövşənin maşının qapısını da açıb bağlaya bilməzdi. Rəşid müəllim demişkən, lotusanmı ə sən? Əgər lotusansa və cəsarətin çatırsa, get “Rufo”ya iliş də. Cəmi bir saata qarşısında diz çökdürərlər, qırıq qulağını da kəsib küçəyə tullayarlar. Şəhərdə ən bahalı maşınlar bu idmançılardadır, yanlarından sürətlə ötsən, gəlib boynunu qırarlar, ən təm-təraqlı məclislər, bahalı restoranlar da bunların ixtiyarındadır. Nə edib də, bunlar, kimdirlər axı!? Gedib döşək üstündə birini yerə yıxıb pul qazanmısan da, səndən bu xalqa, bu dövlətə nə fayda var axı… Döşək üstündə min dəfə də bayraq qaldırsan da, Lələtəpədə, Füzulidə, Xankəndidə bircə dəfə Azərbaycan bayrağını qaldıranlar qədər milli zövq verə bilmirsən. O XTQ zabitlərinin yerinə siz olsaydınız, indi belimizə minərdiniz. Bəlkə bir erməninin burnunu qanadmısan? Döşəkdə yox, həqiqi döyüşdə! Yerini və dəyərini saxlamağı bacar da!

Bütün bunlarla yanaşı, bizim nə qədər mədəni, sadə, ailəcanlı çempionlarımız var, onları cəmiyyətimiz də yaxşı tanıyırlar. Başlarını aşağı salıb işlərini görürlər, onlara sataşsan da, səni döyəsi deyillər.

İndi çarx fırlanıb, Federasiyada Ramaldan hamı imtina edir, onun Federasiyada daşıdığı vəzifələri də əlindən alıblar. Ona görə yox ki, Federasiyada Ramalın pis əməlini qiymətləndirib onu cəzalandırıblar. Ona görə edirlər ki, özlərini qorusunlar. Yəni, “vallah, biz hamımız yaxşıyıq, sakit uşaqlarıq, Ramal pis idi və qovduq”. Məsuliyyəti öz üzərlərindən atırlar. Məgər biz bilmirik ki, Ramala o özgüvəni, arxayınlığı verən kim(lər)dir?!

Və bir də... Fuad Zeynalov da idmançıdır, ondan qorxduqlarına görə 4-5 nəfər üstündə hücum çəkib. Ramal özü tək çıxardı da onun qarşısına. Sadəcə qorxub. Yəqin ona kresloda oturub sifariş verməyin nə demək olduğunu da izah edəcəklər.

"Dia.az"


Aftv.Az