Məktəb direktorunun sistematik rüşvət üzrə müavini... - Nazirin açıqlamasına sözardı

Elm və təhsil naziri Emin Əmrullayev babat açıqlama verib. Mövzu məktəblərdə rüşvətdir. Nazir deməyib e, rüşvət yoxdu, ola bilməz, zad. Deyib ki, orta məktəblərdə sistematik rüşvət yoxdur. Yəni bu o deməkdir ki, var, amma sistemləşdirməmişik.

Rüşvəti sistemləşdirmək nə deməkdir? Yəni rüşvət məsələsi məktəblərdə səsə qoyulmalı, nazirliyə təqdimat göndərilməli, nazir baxıb, qərar verməli və məktəbdə rüşvət qanuniləşdirilməlidir? Yoxsa rüşvət məsələsi dərsliklərə salınmalıdır? Bu nə açıqlamadır? Məntiqi nədir? Nə demək istəyib cənab nazir?

Hələ açıqlamanın ardı da var. Cənab Əmrullayev deyib ki, Azərbaycanda 4400 orta məktəb var, bəs hamısına bir-bir nəzarət edə bilmirik. Gülünc açıqlamadı, ya yox?

Nə edək, indi orta məktəblərin idarə olunması üçün əlavə qurum da yaradaq? Bu, ölkənin səhiyyə sistemidir ki, bölünsün, yarısı Səhiyyə Nazirliyinə, yarısı TƏBİB-ə verilsin? Bəlkə orta məktəblərin bir hissəsini Kənd Təsərrüfatı Nazirliyinə versinlər? Baxma da, Kənd Təsərrüfatı Nazirliyinin çöllərdə, bölgələrdə əməkdaşları çoxdur, məktəblərə də bir-bir nəzarət edərlər. Təhsil Nazirliyinin əməkdaşları azdır, məktəblərə adambaşına bir nəzarətçi təyin edə bilmirlər. Yazıqlar hər məktəbə cəmi bir direktor, 4 direktor müavini, bir təşkilatçı təyin edib ki, onlar da dərs “yükü”nü çəkə bilmirlər. Ona görə də rüşvətə nəzarət etməyə kadr tapılmır.

Mən, iraq olsun, nazirin yerində olsam, orta məktəbdə direktora rüşvət üzrə də bir müavin ştatı yaradardım. Müavinlərdən biri tədris üzrə, biri tərbiyə üzrə, biri kütləvi tədbirlər üzrə, biri təsərrüfat üzrə məşğul olanda, biri də rüşvət üzrə işləyərdi. Yoxsa, başqa cür çatdırmaq olmaz. Bir müavin bir işlə məşğul olar da, bir neçə işlə düz gəlmir axı. Emin müəllim də əslində bunu demək istəyib e, amma camaat bunu anlamır.

Məncə düşünməyə dəyər. Orta məktəblərdə pul yığımının qarşısını başqa cür almaq olmaz. Yığım da bir istiqamətdə deyil ki... Yenə bir istiqamətdə olsa, cəhənnəmə, birinə tapşırarsan, öhdəsindən gələr. Yoxsa fon pulu, süpürgə pulu, təmir pulu, pərdə pulu, zibil pulu, jurnal pulu, tədbir pulu, direktorun ad günü pulu, müavinləri toy pulu, pulu, pulu, pulu....

Belə bir çoxşaxəli hadisələr içərisində bunların hansının qarşısını ala bilərsən? Təbii ki, olmaz! Bir az insafla düşünək də. Nazir bir nəfər, məktəb 4400. Hər məktəbdə də 1000 nəfərə yaxın şagird. Buna nazir dözər? Dözməz!

Samir Əli - TNS.az

Aftv.az