“Şaurma 1” işi: Aqil Babayevə qarşı saxta ittihamlar ifşa olunur: Şübhəli İttihamlar və Sübutların Yoxluğu

Aqil Babayevin 12 il müddətinə azadlıqdan məhrum edilməsinə səbəb olan cinayət işi ölkəmizdə hüquqi sistemin ədalət və şəffaflıq prinsiplərinə uyğunluğu barədə mübahisələrə səbəb olub. Babayevə qarşı irəli sürülən ittihamlar və məhkəmə prosesində üzə çıxan sübut çatışmazlıqları bu işin yenidən araşdırılmasını tələb edən əsas səbəblərdən biridir. Təqsirləndirilən şəxs bu ittihamların əsassız olduğunu iddia edir və məhkəmə prosesinin ədalətsiz şəkildə aparıldığını vurğulayır.
Babayevin müdafiəçiləri də ona qarşı sürülən iddiaları əsassız və sübutu olmayan ittihamlar kimi dəyərləndirir. Müdafiə tərəfi qeyd edir ki, Babayevin dələduzluq əməli törətməsi barədə heç bir əsaslı sübut yoxdur və minlərlə mətn mesajında belə bir iddianın dəstəkləndiyi təsbit edilməyib.

Sübut Çatışmazlığı və Şübhəli İfadələr

Babayevə qarşı irəli sürülən əsas ittihamlardan biri – müxtəlif insanlardan pul alınması ilə bağlı ittihamların sübutunun zəifliyi və zərərçəkən şəxslərin ifadələrindəki şübhəli məqamlarla bağlıdır. Məhkəmə prosesində bəzi zərərçəkənlərin ifadələrinin mübahisəli olduğu, onların ifadələrinin ziddiyyətlər və təkrarlanan səhvlərlə dolu olduğu qeyd edilir. İbtidai istintaq və məhkəmə prosesi zamanı isə iddia edilən cinayət faktlarına dair konkret sübutların tapılmaması müdafiə tərəfinin iddialarını gücləndirir.
Digər tərəfdən, Babayevin restoran biznesində – “Şaurma 1” restoranlar şəbəkəsində Natiq Sadıqov adlı ortağı ilə yaşadığı kommersiya mübahisəsi bu işin əsasında duran əsas səbəblərdən biri kimi təqdim edilir. Müdafiə tərəfi qeyd edir ki, Sadıqov Babayevin biznesdəki payını ələ keçirmək üçün ona qarşı saxta cinayət işi açdırıb və prosesdə müəyyən yüksək vəzifəli şəxslərin dəstəyi ilə ittihamları irəli sürüb. Bu iddia məhkəmə işinin şəffaflığına dair ciddi suallar doğurur.
Bundan əlavə Anar Aslanov Babayevə qarşı saxta ittihamların qurulmasında əsas iştirakçılardan biri hesab olunur və “zərərçəkmiş” kimi təqdim olunan digər şəxslərlə birlikdə saxta ifadələr verərək Aqil Babayevin evindən oğurluq etməsi faktını ört basdır etməyə çalışıb.

Məhkəmə Prosesində Ədalətlilik Prinsiplərinin Pozulması

Aqil Babayevin müdafiəsi, məhkəmə prosesində dini mövzuda ifadə verən şəxslərin fikirlərinin düzgün qiymətləndirilməməsi və ekspert rəylərinin nəzərə alınmaması kimi hallara diqqət çəkir. Məhkəmə zamanı ekspertlərin iştirak etməməsi, mətnlərin düzgün təhlil edilməməsi və dini məzmunlu ifadələrin yanlış anlaşılması müdafiə tərəfi üçün əsas narahatlıq mənbəyidir. Müdafiəçilər vurğulayır ki, islam dini üzrə savadlı mütəxəssislərin iştirakının olmaması, Babayevin ifadələrinin və yazışmalarının yanlış şərh edilməsinə gətirib çıxarıb.

İctimai Rəy və Hüquqi Ədalət Tələbi

Bu iş cəmiyyət arasında geniş müzakirələrə səbəb olub və ədalət tələb edənlərin sayı artmaqdadır. Ailə üzvlərinin iddialarına görə, Babayevin azadlıqdan məhrum edilməsi barədə verilən hökm ədalətsizdir və prosesdə aparılan araşdırmalar tam şəkildə həyata keçirilməyib. Müdafiə tərəfi, məhkəmədən müstəqil və şəffaf ekspert rəyi ilə mətnşünaslıq ekspertizası aparılmasını, eləcə də “zərəçəkənlərdən” alınan ifadələrin yenidən qiymətləndirilməsini tələb edir.
Bütün bu iddialar işin yenidən araşdırılması, Babayevin üzərindəki ittihamların ədalətli və obyektiv şəkildə araşdırılması zərurətini gündəmə gətirir. Babayevin məhkəmə prosesində dindar şəxslərdən ibarət bir qrup tərəfindən psixoloji təzyiqlərə məruz qalması iddiası və məhkəmə tərəfindən sübut kimi təqdim olunan ifadələrin hüquqi dəyərləndirilməsi məsələsi də işin obyektivliyinə təsir göstərir.

Ədalətli araşdırma və Bəraət Tələbi

Aqil Babayevin işində üzə çıxan hallar və sübut çatışmazlığı onun ədalətli məhkəmə hüquqlarının pozulub-pozulmadığı barədə suallara cavab axtarmağa yönəlib. Müdafiə tərəfi sübutların qeyri-kafi olduğunu iddia edərək, Babayevin bəraətini tələb edir. İddiaların ətrafında ortaya çıxan çoxsaylı mübahisələr və məhkəmə prosesindəki çatışmazlıqlar, bu işin yenidən və daha obyektiv şəkildə araşdırılması üçün əsas verir. Bu, yalnız Babayevin taleyi üçün deyil, ölkəmizin hüquqi sisteminin ədalət və şəffaflıq prinsiplərinə nə dərəcədə uyğun işlədiyini göstərən mühüm bir sınaq kimi də qiymətləndirilə bilər.
anaxeber
Qarşı tərəfində mövqeyini dərc etməyə hazırıq!
(TEREF)

Aftv.az