Əmlak komitəsindən prezidentə sabotaj: Elçin Yusubov və komandası qaçqınların məskunlaşdığı düşərgəni satıb

Ərazini alan iş adamı məcburi köçkünlərin yolunu bağlayıb, torpaqlarına sözün həqiqi mənasında şum vurub
Əmlak Məsələləri Dövlət Xidmətinin rəis müavini Elçin Yusubov7 fevral prezident seçkiləri ərəfəsində Novxanı çimərliyi yaxınlığında, “Spring” oteldən bir kilometr uzaqlıqda yerləşən  “Sarıqaya” yaşayış massivinin “Metallurq” düşərgəsində yaşayan məcburi köçkün düşərgəsini zəbt edib. Bununla bağlı cumhuriyyet.az-a daxil olan məlumata görə, düşərgədə sıx məskunlaşmanın mövcud olduğu, orada yaşayan qaçqınların öz dədə-baba torpaqlarına hələ köç etmədiyinə baxmayaraq, düşərgənin bir hissəsini məşhur iş adamlarından birinə satılıb. Artıq 3 gündür ki, ərazidə ağır texnikaların iştirakı ilə qızğın iş gedir. Ərazini satın alan iş adamı Əmlak Məsələləri Dövlət Xidmətinin məmurlarını qabağa verərək öz biznes ambisiyalarını gerçəkləşdirməyə çalışır. Məcburi köçkünlərin narazılığına yol verməmək üçün iddia edilir ki, guya Əmlak Məsələləri Dövlət Xidməti ərazidə park salır. Yəni ərazidə heç bir tikinti işi aparılmayacaq. Lakin təbii ki, vətəndaşlar buna inanmır və onlar hesab edir ki, onların pərən-pərən salınmasında məqsəd hansısa məmurun, iş adamının maraqlarını təmin etməkdir.
Kimin nə deməyindən asılı olmayaraq fakt budur ki, məcburi köçkün düşərgəsinin bir hissəsi zəbt edilib. Məcburi köçkünlərə məxsus həyətyanı sahələrin hasarları, eləcə də bir sıra yardımçı təsərrüfatlar sökülüb. Məcburi köçkünlər ortada qalan əşyaları ilə nə edəcəklərini, onları hara daşıyacaqlarını bilmir. Ərazidəki sakinlərin cumhuriyyet.az-a bildirdiyinə görə, düşərgənin əsas magistrala açılan hissəsi Elçin Yusubov tərəfindən satıldığı üçün məcburi köçkünlərin istifadə etdiyi iki avtomobil yolunun biri bağlanıb. Habelə, məcburi köçkünlər artıq ictimai nəqliyyatdan istifadə etmək üçün bir kilometrdən də çox əlavə məsafə qət etməlidir.
Bundan başqa, iş adamının Əmlak Məsələləri Dövlət Xidmətinin əli ilə düşərgədə məskunlaşan məcburi köçkünlərin Qarabağa köçməsini gözləmədən onları başqa bir yerə köçürəcəyi ilə bağlı ehtimallar səslənir ki, bu da düşərgədəki narazılığı daha da artırır.  Məcburi köçkünləri daha çox bir məsələ düşündürür: Prezident İlham Əliyevin qaçqınlara qayğıkeş münasibəti fonunda onlara, eləcə də dövlət siyasətinə “Böyük köç” ərəfəsində meydan oxuyan hansı məmurdur? Prezident İlham Əliyev 30 il ərzində bu ərazidə məskunlaşan məcburi köçkünlərə hər cür şərait yaratdığı halda, Əmlak Məsələləri Dövlət Xidməti  niyəqçaqınların Qarabağa köç etməsi üçün 1-2 il səbr etmir?  Doğrudanmı pul faktoru dövlət başçısının göstərişindən, məcburi köçkünlərə olan qayğıkeş münasibətindən daha önəmlidir?
Məsələ ilə bağlı cumhuriyyet.az-ın apardığı araşdırma nəicəsində məlum olub ki, təxminən 3 il öncə “metallurq” qaçqın düşərgəsinin qonşuluğunda yerləşən daha bir məcburi köçkün düşərgəsi – “Şəfəq” eyni aqibətlə üzləşib. Belə ki, düşərgədə məskunlaşan vətəndaşlar Masazıra köçürülüb və onların yaşadığı torpaqlarda bahalı kotejlər inşa edilib. Maraqlıdır ki, həmin köçkün düşərgəsinin ərazisinin satışı Elçin Yusubovun xeyir-duası,  Əmlak Məsələləri Dövlət Xidmətinin şöbə müdiri Taleh Bəşirovun fəallığı ilə baş tutub.