Suriyada qanunsuz hərbi birləşmələrdə döyüşən 13 nəfərə hökm oxundu

Xarici ölkə ərazisində qanunsuz silahlı birləşmələrə qoşulmaqda ittiham olunan Azərbaycan vətəndaşlarının cinayət işi üzrə məhkəmə istintaqı yekunlaşıb.
Aftv.az-ın məlumatına görə, bu barədə qərar Bakı Ağır Cinayətlər Məhkəməsinin hakimi Əhməd Quliyevin sədrliyi ilə keçirilən iclasda qəbul edilib.
Daha sonra ittiham nitqi ilə çıxış edib.
Prokuror məhkəmədən təqsirləndirilən şəxslər - Şəmil Abdullayev 8 il 6 ay, Murad Ağamətov 8 il 6 ay, Murad Quliyev 8 il 6 ay, Fərhad Rüstəmov 8 il 6 ay, Sultan Sultanov 8 il 6 ay, Nəcməddin Hüseynov 8 il 6 ay, Hikmət Mahmudov 8 il 6 ay, Mais Əliyev 8 il 6 ay, İsmayıl İsmayılov 7 il 6 ay, Şəhriyar Babayev 9 il, Hacı Muradov 8 il 6 ay, Əlövsər Baxışov 9 il və İntiqam Əsədovun 8 il müddətinə azadlıqdan məhrum edilməsini istəyib.
Daha sonra təqsirləndirilən şəxslərin müdafiə çıxışları olub.
Daha sonra məhkəmə tərkibi hökmü elan etmək üçün müşavirə otağına gedib.
Müşavirədən sonra hökm elan edilib.
Hökmə əsasən, təqsirləndirilən şəxslər - Şəmil Abdullayev 7 il, Murad Ağamətov 7 il, Murad Quliyev 7 il, Fərhad Rüstəmov 7 il, Sultan Sultanov 7 il, Nəcməddin Hüseynov 7 il, Hikmət Mahmudov 7 il, Mais Əliyev 7 il, İsmayıl İsmayılov 7 il, Şəhriyar Babayev 7 il, Hacı Muradov 7 il, Əlövsər Baxışov 7 il və İntiqam Əsədovun 7 il müddətinə azadlıqdan məhrum ediliblər.
Qeyd edək ki, ötən ilin iyun ayında Dövlət Təhlükəsizlik Xidmətinin (DTX) yaydığı məlumatda deyilir ki, aparılmış araşdırmalar nəticəsində Azərbaycan vətəndaşlarından ibarət, ölkə hüdudlarından kənarda terror aktlarının törədilməsi ilə müşayiət olunan, dini düşmənçilik, dini radikalizm və dini fanatizm zəminində aparılan silahlı münaqişələrdə iştirak etmək məqsədilə qeyri-leqal yollarla Suriya Ərəb Respublikasının ərazisinə keçdikdən sonra həmin dövlətin İdlib şəhərində xüsusi hazırlıq düşərgəsində təlimlərə cəlb olunaraq müxtəlif növ odlu silahlardan istifadə qaydalarına yiyələnib, “Taifatul Mansura” adlı qanunsuz silahlı dəstənin tərkibində döyüşlərdə iştirak etmiş sabit qrupun üzvləri müəyyən olunmuş və barələrində beynəlxalq axtarış elan edilib.
Başlanılmış cinayət işi üzrə həyata keçirilmiş əməliyyat-istintaq tədbirləri ilə yuxarıda qeyd olunan cinayət əməllərini törətmiş 13 nəfər Azərbaycan vətəndaşının - Abdullayev Şəmil Töhüd oğlu, Ağamətov Murad Əlibala oğlu, Quliyev Murad Firudin oğlu, Rüstəmov Fərhad İsə oğlu, Sultanov Sultan İdris oğlu, Hüseynov Nəcməddin Nəzir oğlu, Mahmudov Hikmət Sahib oğlu, Əliyev Mais Telman oğlu, İsmayılov İsmayıl Aydın oğlu, Babayev Şəhriyar Rahim oğlu, Muradov Hacı Arif oğlu, Baxışov Əlövsər Əlisafa oğlu və Əsədov İntiqam Şirin oğlunun xarici ölkə ərazisində gizləndikləri yerlər müəyyənləşdirilib və onlar beynəlxalq axtarışa dair qarşılıqlı hüquqi yardım proseduru çərçivəsində müvafiq tədbirlərlə saxlanılaraq Azərbaycana gətiriliblər.
Sözügedən şəxslər Cinayət Məcəlləsinin 283-1.3-cü (Azərbaycan Respublikasının hüdudlarından kənarda silahlı münaqişələrdə iştirak etmək məqsədilə sabit qruplar yaratma, həmin qruplarda, təlimlərdə və ya silahlı münaqişələrdə iştirak etmə) maddəsi ilə təqsirləndirilən şəxs qismində cinayət məsuliyyətinə cəlb olunaraq, məhkəmənin qərarı ilə barələrində həbs qətimkan tədbiri seçilib.