Litvadan diqqətçəkən qərar: Nüvə silahına yol açılır

Litva Seymi (parlamenti) ölkə ərazisində nüvə silahının yerləşdirilməsinə dair qadağanın ləğv edilməsini nəzərdə tutan qanun layihəsini qeydiyyata alıb.
Aftv.az xəbər verir ki, bu barədə qanunverici orqanın katibliyindən məlumat verilib.
"Qanun layihəsinin irəli sürülməsi təşəbbüsü 50 deputatın imzası ilə dəstəklənib ki, bu da sənədin qeydiyyata alınması üçün kifayət edir", - deyə məlumatda vurğulanır.
Təqdim olunan sənədə əsasən, ölkə konstitusiyasının kütləvi qırğın silahlarının, o cümlədən nüvə silahının Litva ərazisində yerləşdirilməsini qadağan edən 137-ci maddəsinin ləğv edilməsi planlaşdırılır.
Bir gün əvvəl ölkə prezidenti Gitanas Nauseda hökumət başçısının, müdafiə nazirinin, Seym spikerinin və parlament fraksiyaları sədrlərinin iştirakı ilə müşavirə keçirib. Toplantı iştirakçıları konstitusiyadakı sözügedən qadağadan imtina etmək niyyətini dəstəkləyiblər.
Konstitusiyaya dəyişiklik edilməsi üçün parlamentdə üç ay fasilə ilə iki dəfə səsvermə keçirilməlidir. Yeni qərarın qəbul olunması üçün 141 deputatdan 94-nün dəstəyi tələb olunur.