Özünü `ŞİRVANŞAH` zənn edən icra başçısı... - İLGİNC FAKTLAR...

2 il paytaxtın Nərimanov, 16 il Suraxanı kimi böyük rayonlarının icra başçısı işləmiş və 5 ildir ki, Şirvan şəhər icra hakimiyyətinin başçısı olan İlqar Abbasovun iməmur kimi fəaliyyəti ilə bağlı cumhuriyyet.az olaraq media üzərindən araşdırma apardıq. Məlum oldu ki, məhz İ.Abbasovun yarıtmaz fəaliyyətinin nəticəsi həm rayonun simasının zədələnməsinə səbəb olub, həm də sakinlər əlavə problemlərlə üzləşmək məcburiyyətində qalıblar.
Kimdir İlqar Abbasov?
Suraxanı Rayon İcra Hakimiyyətinin başçısı İlqar Abbasovun haqqında «vikipediya» səhifəsində elə də zəngin məlumat yoxdur. Onun neçənci ildə və harada anadan olması göstərilməyib. Həmin səhifədə qeyd olunub ki, İlqar Abbasov Azərbaycan İnşaat Mühəndisləri İnstitutunu 1979-cu ildə sənaye və mülki tikinti ixtisası üzrə, 1993-cü ildə isə Bakı Sosial İdarə etmə və Politologiya institutunu bitirib. Müxtəlif tikinti idarələrində çalışıb, sahibkarlıq fəaliyyəti ilə məşğul olub. 2004-2005-ci illərdə Bakı Şəhəri Nərimanov Rayon İcra Hakimiyyətinin başçısı vəzifəsində çalışıb. Azərbaycan Respublikası prezidentinin 21 dekabr 2005-ci il tarixli Sərəncamı ilə Bakı Şəhər Suraxanı Rayon İcra Hakimiyətinin başçısı, 2020-ci ildə Şirvan Şəhər icra Hakimiyyətinin başçısı vəzifəsinə təyin edilib.
Suraxanıda torpaq alveri, tikinti icazəsi və biznes…
Apardığımız araşdırmalarımız göstərir ki, ötən illər ərzində İlqar müəllim Suraxanı rayonunun abadlaşması, yerli camaatın problemlərinin həll olunması istiqamətində heç bir iş görməyib. Daha dəqiq desək, buna cəhd belə göstərməyib. Əvəzində şəxsi maliyyə imkanlarını genişləndirib, obyektlərinin sayını artırıb. Məsələn, rayonun Yeni Günəşli qəsəbəsindəki ticarət obyektlərinin bir çoxu başçıya məxsusdur. Növbəti yazıda bunu şəkillərlə və daha geniş faktlarla diqqətinizə çatdıracağıq. Hörmətli icra başçısı iddia edə bilər ki, həmin obyektlər onun adına deyil. Amma bu cənab başçının biznes fəaliyyəti ilə məşğul olmadığı anlamına gəlmir.
Çoxları bilir ki, bu şəxs icra hakimiyyəti strukturlarında işləməmişdən əvvəl aktiv biznes fəaliyyəti ilə məşğul olub. Deyəsən, İlqar Abbasov Suraxanı rayonuna və onun qəsəbələrinə, rayonun yerli idarə və müəssisələrinə də biznes strukturu kimi baxır. Bəlkə də… Başçının adı torpaq alverində tez-tez hallandırılır. Məhz bu səbəbdən mediada Suraxanının adı çox vaxt torpaq alveri ilə bağlı hallandırılıb. Bildirilib ki, rayonun Bülbülə, Əmircan, Hövsan, Zığ, Yeni Günəşli, Yeni Suraxanı və Qaraçuxur qəsəbələrində boş torpaq sahəsi tapmaq olmur. Tikinti üçün verilən sərəncamlar 3000 manatdan yuxarıdır.
İki Bacanağın Şirvan monopoliyası
İlqar Abbasov Şirvana təyinat alandan sonra müavini Etibar Yolçuyevi Suraxanıda tək qoymadı, dərhal yanına gətirdi, onu müavini təyin etdi ki, qeyri-rəsmi işlərini asanlıqla görə bilsin. Çünki Abbasovla Yolçuev ayrılmaz məmur cütlüyüdürlər. Bu da təsadüfi deyil. Yolçuyev Abbasovun bacanağı olduğu üçün can deyib, can eşidir, birgə addımlayırlar.
Suraxanını viran qoyan, abadlıq işləri görməyən icra başçısı ilə müavini Şirvana gəldiyi gündən də əlini ağdan qaraya vurmayıb. Şəhərdə nə abadlıq-quruculuq işlərində, nə Mərdan Camalovdan qalan problemlərin həllində hansısa dəyişiklik olunub.
Bütün maxinasiyaları gizlətmək üçün komandaya “yad adam” buraxmaq olmaz. Bəli, İlqar Abbasov Nərimanovda, Suraxanıda qazandığı təcrübəni indi də Şirvanda tətbiq edir. İ.Abbasovun kadr təyinatlarının qəribəliyi təkcə bacanağını yanına gətirməsi ilə məhdudlaşmır. Məsələn, Sabirabad rayon sakini Şirvan şəhər icra hakimiyyəti başçısının müavini vəzifəsinə təyin olunub. Belə ki, Şirvan şəhər icra hakimiyyətinin başçısına şəhər təsərrüfatı üzrə müavin təyin olunan Orxan Əhmədağa oğlu İbrahimov Baş Şirvan kollektor idarəsinin rəisi Əhmədağa İbrahimovun oğludur. Əhmədağa İbrahimov İlqar Abbasovla yaxın dostdurlar. Mərhum müavin Şəfahət Əsgərovun vəzifəsini Orxan İbrahimov kimi şəhərdən bixəbər, naşı və savadsız gəncə həvalə etmək yalnız İlqar Abbasovun idarəçilik məharətinin məhsulu ola bilərdi.

Abbasov qardaşlarının digər macəraları

Şirvan şəhər icra hakimiyyətinin başçısı olan İlqar Abbasovun qardaşları İmran Abbasov və İlham Abbasov haqda ilginc məlumatlar var. Icra başçısının böyük qardaşı İlham Abbasov isə 2014-cü ildə bakıda şirniyyatçı kimi fəaliyyət göstərən Vüqar Əhmədovun pulunu və avtomobilini mənimsəyib. Belə ki, Vüqar Əhmədov İlham Abbasova aid Xırdalanda fəaliyyət göstərən və “Az Pal” şirkətindən un alıb. Bir müddət sonra una görə şirkətə borcu yaranıb. Şirkət sahibi də ona borcu qaytarması üçün iki ay möhlət verib. Əvəzində isə onun hələ kredit ödənişi başa çatmayan “Mercedes” markalı avtomobilini qeyri-rəsmi girov götürüb. Vüqar Əhmədov borcu ödəyəndən sonra avtomobilini geri istəyəndə ona məlum olub ki, şirkət sahibi avtomobili ona satmış şəxslə əlbir olaraq başqasına satıb. İndi isə cumhuriyyet.az-a İlham Abbasovun yeni dələduzluğu ilə bağlı məlumat daxil olub. Belə ki,. Onun qızı və həyat yoldaşı vətəndaş Səadət Həsənovanın 47 min manatını mənimsəyib. Bu haqda vətəndaş özü danışır:

Redaksiyamıza daxil olan məlumata görə icra başçısının digər qardaşı, əvvəllər DYP-də çalışmış İmran Abbasov 4 il Nəsimi rayon su idarəsinə rəhbərlik etdikdən sonra, Azərsu ASC-də departament rəisinin müavin və daha sonra indiki vəzifəsinə təyin olunub. Deyilənə görə, İmran müəllimin kənar biznes şəbəkəsində pivə istehsalına, arpa, buğdaya qədər payı var.

cumhuriyyet.az

Aftv.az