Məşhur vəkilə qarşı şok ittiham: 7 min manat pul alıb...

Hazırda həbsdə olan Cəfərov Zaur Akif oğlu tanınmış vəlik Adəm Məmmədov haqda ittihamlar səsləndirib.
İqtisadiyyat xəbər verir ki, Sumqayıt Ağır Cinayətlər Məhkəməsinin 1(124)-139/2022 saylı, 15.12.2022-ci il hökmü ilə Azərbaycan Respublikası Cinayət Məcəlləsinin 177.2.2, 177.2.3, 177.2.4 və 228.4-cü maddələri ilə nəzərdə tutulmuş cinayət əməllərinin törədilməsində təqsirli bilinərək, Azərbaycan Respublikası Cinayət Məcəlləsinin 177.2.2, 177.2.3, 177.2.4-cü maddələri ilə ona 5 il, Azərbaycan Respublikası Cinayət Məcəlləsinin 228.4-cü maddəsi ilə 9 ay müddətində azadlıqdan məhrum etmə cəzası təyin edilib. 
Təqsirləndirilən Cəfərov Zaur Akif oğluna qərəzli ittiham olunduğunu iddia etdiyi 234.4.3-cü maddəsi ilə bağlı bəraət hökmü verilsə də, təqsirləndirildiyi 228.4 maddəyə əsasən təyin olunmuş 9 ay müddətində azadlıqdan məhrum etmə qərarı hələ də qüvvədədir. 
Zaur Cəfərov iddia edir ki, vəkili Adəm Məmmədov ona təyin olunan qərəzli ittihamlarla bağlı bəraət alacağına söz verərək, ondan  3 min və 4 min manat olmaqla, ümumilikdə 7 min manat pul alıb. Lakin iddiaya əsasən, vəkil Adəm Məmmədov qərəzli hesab edilən ittihamlarla bağlı yuxarı instansiya məhkəməsində və Ali Məhkəmənin Cinayət Kollegiyasına edilən kassasiya şikayətində iştirak etməyib və düzgün iddia qaldırmayıb. Zaur Məmmədov ailə üzvlərinin vəkillə dəfələrlə əlaqə saxlamağa cəhd etdiyini desə də, zənglər və müraciətlər cavabsız qalıb. Adəm Məmmədovla bağlı Zaur Cəfərov tərəfindən bir sıra dövlət qurumlarına şikayət ərizəsi təqdim olunub.
Vəkil Adəm Məmmədov iddia ilə bağlı Yenisabah.az-a açıqlamasında bildirib ki, təqsirləndirilən Zaur Cəfərovla bağlı qərəzli ittiham hökmlərinin hər ikisi ilə bağlı bəraət təmin olunub.
“Cinayət Məcəlləsinin 234.4.3 və 228.4 maddələri ilə ittiham olunan Zaur Cəfərova məhkəmə tərəfindən bəraət verilib. Biz bununla bağlı Apellyasiya Məhkəməsinə müraciət etdik və 228.4-cü maddəyə əsasən təyin olunan 9 ay müddətində həbs ümumi həbs müddətindən çıxarıldı. Mən bu işlərlə həm Sumqayıt Ağır Cinayətlər Məhkəməsində, həm də apelliyasiya məhkəməsində iştirak etmişəm. Ali Məhkəməyə edilən kassasiya şikayətinə isə Zaur Cəfərovun yaxınları gəlmədi”. 
Aftv.az