İranla müharibənin altı həftəyə yaxın davam etməsi müasir savaşın mahiyyəti barədə bir çox təsəvvürü alt-üst edib. Dünənədək mümkün ssenarilərdən biri kimi görünən mənzərə bu gün artıq yeni hərbi reallığın konturlarını cızır: ABŞ və İsrail təkcə yüksək səviyyəli döyüş koordinasiyası nümayiş etdirmədi, həm də zərbə, kəşfiyyat və raketdən müdafiə sistemlərinin effektivliyinə yenidən baxmağa vadar edən taktiki icra keyfiyyəti ortaya qoydu.
28 fevraldan atəşkəs qüvvəyə minənədək ABŞ və İsrail qüvvələri İranın hərbi infrastrukturunu sistemli şəkildə dağıdır, yaxın vaxtadək qorunan, səpələnmiş və vurulması çətin sayılan obyektlərə zərbə ardınca zərbə endirirdilər. İran da cavabsız qalmadı, sərt, genişmiqyaslı və ağrılı həmlələrlə qarşılıq verdi. Amma məhz burada bu müharibənin yeni mahiyyəti üzə çıxdı: Tehranın cavabı bir çoxlarının ümid bağladığı strateji dönüş nöqtəsinə çevrilmədi, əksinə göstərdi ki, hətta kütləvi raket və dron hücumları belə artıq həlledici effektə təminat vermir.